Atik Manno Ejèn*
KRANP oubyen Twa powèm pou leta 2, se yon pwezi repòtaj ki ekri tou cho, prèske an dirèk. Yon ekriti ant yon langaj kolorye ak yon pawoli chantrèl. Powèt la fè li jounalis fotograf pijis, kameramann tele. An « TSN »,yon pwezi sinematografik kote powèt la ape prezante nou divès kliche an gwo plan, pòtre an kat dimansyon, eta yon vil peyi alatik,ki pran nan tout anng, k ape depafini anba kout dan yon kanibalis deta k ape mòde vil la nan kote ki fè pi mal, pi sansib yo: » … mòde vil la nan dwèt… nan pous, nan kuis… Zoum sou yon leta lougawou k ape prije, peze souse yon vil jouk nan dènye degout malsite li.
« kite m di w cheri
kòman peyi a leve lè bri bal tounen bo
suiv bonnanj nou
tout san fèmen pòt
lari pran jwe ak bonnanj ti bebe
n ap degoute souf
lanmò ap degoute nou
syèl nou chire vwa nou tounen mizik
envante malè nou »
Nan yon patisip / aksyon, ekriti powèt la » live « , an dirèk, powèt la pa rete endiferan devan reyalite sovkipe ki lage atè plat. E se ak yon rèl tou delkachte l ape livre nou fon nanm li tou merilan ki pote sou bò goch li tout lapenn vil la k ape deperi devan zye li, anba plim li.
« limanite manje idantite mwen
lenfini blese souf nou
yon ti bebe fenk fèt
pote doulè Pòtoprens sou vant li
kè m gwòs inosans timoun
k ap bay limanite manti ak kò yo
lè lannuit site non
tout fanm twotwa joure »
*Powèt, nouvelis, eseyis
Prezidan fondatè Regwoupman Ekriven Kreyòl (REK)
Manm Sosyete Koukouy
______________
PS: SiBelle Haïti veut produire un travail de qualité dans le secteur, et pour cela, souhaite vivement financer son programme pour qu’il puisse durer. Si vous êtes intéressés à contribuer ou à aider, envoyez un mail à sibellehaiti@gmail.com, notre équipe s’entretiendra avec vous pour savoir comment vous pouvez le faire.
N’hésitez pas à aimer nos pages Facebook, Twitter et Instagram, à partir de ces liens :
https://www.facebook.com/SiBelleHaiti/
https://twitter.com/SiBelleHaiti?s=08
https://www.instagram.com/invites/contact/?i=1w2simhemzyle&utm_content=6j1ixsn