Lord Edwin BYRON
Sou yon koutje
W ap wè m s on powèt tòg
K ap fè lari
Sou yon dezyèm
Si w pèsiste
W ap wè m s on powèt an chit lib
Mal ateri nan yon kratè san
Kav-Alye Pierre se yon powèt grenn pwomennen. Yon nonm libelibè ki dekrete la pèmanans nan chache kote lespwa ak lavi fè kwen. « Pwason lari » se premye rekèy powèm li ki parèt nan edisyon « Gouttes-Lettres » nan lane 2020.
Nan zèv sa, powèt la pa kache foli l, ni li pa mande pèmisyon pou defann rezon kifè l renmen lavi epi simaye lanmou nan chak riyèl nan granchimen. Kav-Alye rive jwenn gwo konplisite ak chak grenn mo pou kreye yon amoni ant tout sa ki ka marande ak yon lòsye lespwa.
Eske w konn chak kilè
Sezon yo defile tou gwòg
Sou ekay pwason basenble
Chak kilè militon politik
Fè pèp laloz
M mache simen konprès sou tèt
Chak moso tè w pile
« Pwason lari » se yon tablo, jan Coutechève Lavoie Aupont lese konprann li nan prefas la. Anpil koulè met men pou rale mennen vini sou tout kalte koze, bri lari a, koze machann kap taye bandan anba solèy, lavi tòg kap dekwat… Yon powèm ki jwenn tout sans li nan revandike lavi ak lanmou, nan kase mete nan men tout sa ki bouche limye lespwa.
« Sa k ta di yon jou lonbray karavàn
Ta gen òkèt
M pa konn ki ti malfektè zòn
Ki pini chen jape
Pyès kretyenvivan pa ka di
Kote lanm sòti jis li echwe
Sou plim sab chèchko
Sèl sa m konnen
Gen pitit deyò
Ki koupe eritaj koutje
Malgre sezon sechrès
Gen chany
Ki konn mare fache ak plakbòl
Pwason lari se yon powèm ki pote koze tout koulè, tout sant pou tout kalte moun. Yon refren ki charye lavi ak mounite. Kav-Alye se yon powèt kap keyi lespwa.
Pwason lari – Kav-Alye Pierre – koleksyon Pwezi 4-5-6 – Edisyon Gouttes-Lettres – 2020